Олий Мажлис палаталари Кенгашининг қарори билан Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институтининг директори лавозимига Отахонов Фозилжон Хайдарович тайинланди.
Ф. Отахонов ҳуқуқшунослик соҳасидаги етук олим, узоқ йиллар давомида суд, адлия органларида раҳбар лавозимларда ишлаган таниқли ҳуқуқшунос ҳисобланади.
Таъкидлаш жоиз, Институт 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларни бажариш, Олий Мажлис палаталари, Қонунчилик палатаси депутатлари ва Сенати аъзолари фаолиятини илмий, ахборот-таҳлилий жиҳатдан таъминлаш, уларнинг фаолият самарадорлигини ошириш, парламентнинг қонун ижодкорлиги ишлари сифатини тубдан яхшилаш мақсадида Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенати Кенгашининг Қўшма Қарори асосида 2017 йил 29 декабрь куни ташкил этилган.
Маълумот ўрнида шуни қайд этиш керакки, ўтган даврда институт томонидан юздан ортиқ қонун лойиҳасини ишлаб чиқиш юзасидан аниқ таклифлар киритилди, Олий Мажлис палаталарининг 12 та қарори лойиҳаси, 50 дан ортиқ қонуности норматив-ҳуқуқий ҳужжат лойиҳалари тайёрланиши баробарида парламент фаолияти учун ўта муҳим бўлган мавзуларга оид 300 дан зиёд ахборот-таҳлилий маълумот ҳамда қонун лойиҳалари юзасидан хорижий тажрибага асосланган илмий-ҳуқуқий хулосалар тақдим этилди.
Ўзбекистон Республикаси Олий Мажлиси Қонунчилик палатаси веб-сайти