2021 йил 21 октябрь куни Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти директори Ф.Отахонов, Институт ходимлари Д.Рахманов, Ж.Худоберганов, Ғ.Муҳаммаджанов, А.Кенжаев ҳамда Германия Федерацияси Бранденбург ўлкаси парламенти депутатлари Я.Редманн, С.Бретц, Г.Хоффманн, Конрад Аденауэр номидаги Фонднинг Марказий Осиё бўйича минтақавий раҳбари Р.Хайне ва Фонднинг лойиҳалар бўйича координатори А.Аликуловлар ўртасида учрашув бўлиб ўтди.
Учрашувдан кўзланган асосий мақсад – Институт ҳамда Германия Федерацияси Бранденбург ўлкаси Ландтаг Тадқиқот маркази билан ҳамкорлик ўрнатиш масаласини кўриб чиқиш ва ўзаро тажриба алмашишдан иборат бўлди.
Учрашув аввалида Институт директори Ф.Отахонов Институт фаолиятини тубдан такомиллаштириш бўйича Олий Мажлис Қонунчилик палатаси ва Сенати Кенгашларининг Қўшма қарорига асосан амалга оширилаётган ишлар ҳамда Конрад Аденауэр номидаги Фонд билан ҳамкорликдаги лойиҳалар юзасидан маълумотларни бериб ўтди.
Шунингдек, Ўзбекистон Республикаси Президентининг 2020 йил 2 мартдаги ПФ-5953-сонли Фармонининг 33-бандига мувофиқ, Институт тузилмасида БМТнинг Парламентаризмни ривожлантириш бўйича ўқув маркази ташкил этилганлиги ва ҳозирда Марказ томонидан вилоят, шахар, туман Кенгашлари депутатлари учун ўқув курслари ташкил этилиб келинаётганлигини қайд этиб ўтди.
Музокаралар чоғида Бранденбург ўлкаси парламенти депутати Я.Редманн сўнгги йилларда мамлакатимизда парламентнинг ролини кучайтириш ва парламент назоратининг таъсирчанлигини ошириш борасида кенг кўламли ислоҳотлар амалга оширилаётганлигини алоҳида қайд этган ҳолда, Германия Федерацияси Бранденбург ўлкаси Ландтаг Тадқиқот маркази билан ҳамкорликни кенгайтириш эканлигини билдириб ўтди.
Хусусан, Институт фаолиятини янги босқичга олиб чиқиш, илмий салоҳиятини янада ошириш, шу жумладан, парламент ҳуқуқи, қонун ижодкорлиги, халқаро ҳуқуқ, қиёсий ҳуқуқшунослик йўналишларида ҳамкорликни давом эттириш масалалари муҳокама қилинди.
Бранденбург ўлкаси парламенти депутати С. Бретц Бранденбург ўлкаси парламенти 6 та фракциядан тақдим этилган 88 та аъзодан иборат эканлиги, ҳар бир фракция ўз фаолият йўналишларига эга эканлиги, депутатлар фаолиятини такомиллаштириш бўйича уларга фракция котибиятидан ёрдамчилар бириктирилганлиги ҳақида маълумотлар берди.
Шунингдек, у Бранденбург ўлкаси парламенти Тадқиқот маркази томонидан депутатларга ҳуқуқий хулосалар бериш тизими йўлга қўйилганлиги, мазкур тизим уч босқичдан хулосаларни ишлаб чиқиш, ишлаб чиқилган хулосаларни парламентга тақдим этиш ва улар томонидан билдирилган фикрлар бўйича депутатлар билан келишган ҳолда парламент муҳокамаларини ташкил этишдан иборат эканлигини қайд этиб ўтди.
Бранденбург ўлкаси парламенти депутати Г.Хоффманн ҳам ўлка парламенти томонидан халқ манфаатларини кўзлаган ҳолда қонунлар қабул қилиниши, бу жараёнда чуқур таҳлил ва ўрганиш ишлари олиб борилишига эътибор қаратилиши, ёшларнинг сиёсий-ҳуқуқий саводхонлигини мунтазам равишда ошириб бориш ва уларни парламент фаолиятига кенг жалб этиш мақсадида турли дастурларни амалга ошириш ҳақида фикрлар билдирди.
Учрашув якунида устувор лойиҳа ва дастурларни биргаликда илгари суриш орқали ўзаро манфаатли ҳамкорликни янада мустаҳкамлаш борасидаги интилиш қатъий эканлиги таъкидланди.
Йиғма ахборот-таҳлил бўлими,
Илмий ҳамкорлик ва халқаро алоқалар шўъбаси