Жорий йилнинг 25 октябрь куни Қорақалпоғистон Республикаси Нукус тумани ҳокимияти биносида БМТ Тараққиёт Дастури, Ўзбекистон Республикаси Олий Мажлиси Сенати, Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти билан ҳамкорликда ўтказилаётган “Маҳаллий вакиллик органлари фаолияти самарадорлигини ошириш ва уларнинг фаолиятига жамоатчиликни кенг жалб қилишниг замонавий механизмларини жорий қилиш” лойиҳаси доирасида амалга оширилган ишларнинг дастлабки натижалари муҳокамасига бағишланган давра суҳбати ўтказилди.
Давра суҳбатида БМТ Тараққиёт Дастурининг лойиҳа раҳбари О.Ғайбуллаев, Қонунчилик муаммолари институти бўлим бошлиғи, юридик фанлари доктори, профессор, лойиҳа раҳбари О.Акилов, Олий Мажлис Сенати девони бўлим бошлиғи, лойиҳа аъзоси Қ.Муқумов, халқ депутатлари Нукус туман Кенгаши раиси О.Уснатдинов, халқ депутатлари Нукус туман Кенгаши котибияти мудири Н.Сейтназаров, туман ҳокимияти ва туман жамоатчилик ташкилотлари раҳбарлари, шунингдек оммавий ахборот воситалари вакиллари иштирок этди.
Тадбирни халқ депутатлари Нукус туман Кенгаши раиси О.Уснатдинов кириш сўзи билан очиб берди.
Қонунчилик муаммолари институти бўлим бошлиғи О.Акилов ўз маърузасида Олий Мажлис Сенати, Адлия вазирлиги, Давлат хизматлари агентлиги, БМТ Тараққиёт Дастурининг “Ўзбекистоннинг қишлоқ ҳудудларида давлат хизматларини тақдим этишни такомиллаштириш ва бошқарув даражасини ошириш” номли қўшма лойиҳаси доирасида ўтказилаётган “Халқ депутатлари маҳаллий Кенгашлари фаолиятининг функционал таҳлили”нинг дастлабки натижалари ҳақида маълумотлар бериб, халқ депутатлари туман Кенгаши доимий комиссияларининг туман ижтимоий-иқтисодий ҳаётида тутган ўрни ва функционал вазифалари ҳақида тўхталиб ўтди.
Кун тартибидаги масалалар юзасидан Олий Мажлис Сенати девонининг бўлим бошлиғи Қ. Муқумов ва БМТ Тараққиёт Дастурининг лойиҳа раҳбари О. Ғайбуллаевлар сўзга чиқиб, лойиҳа доирасида амалга оширилган ишлар юзасидан ўз фикрларини билдиришди.
Муҳокама якунида туман халқ депутатлари Кенгашлари фаолиятини янада такомиллаштиришга қаратилган таклиф ва тавсиялар ишлаб чиқилди.
Йиғма ахборот-таҳлил бўлими