Жорий йилнинг 26 октябрь куни Жиззах вилояти Бахмал туманида
БМТ Тараққиёт Дастури Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти билан ҳамкорликда ўтказилаётган “Маҳаллий вакиллик органлари фаолияти самарадорлигини ошириш ва уларнинг фаолиятига жамоатчиликни кенг жалб қилишниг замонавий механизмларини жорий қилиш” лойиҳаси доирасида амалга оширилган ишларнинг дастлабки натижалари муҳокамасига бағишланган давра суҳбати ўтказилди.
Давра суҳбатида БМТ Тараққиёт Дастурининг лойиҳа раҳбари О.Ғайбуллаев, Қонунчилик муаммолари институти бўлим бошлиғи, юридик фанлари доктори, профессор, лойиҳа раҳбари О.Акилов, халқ депутатлари вилоят Кенгаши котибият мудири Н.Каримова, халқ депутатлари туман Кенгаши котибияти мудири Б.Аманов, туман ҳокимияти ва туман жамоатчилик ташкилотлари раҳбарлари, шунингдек оммавий ахборот воситалари вакиллари иштирок этди.
Тадбирни халқ депутатлари Жиззах вилояти Кенгаши котибият мудири Н.Каримова кириш сўзи билан очиб бериб, юртимизда бўлиб ўтган сайловда Тадбиркорлар ва ишбилармонлар ҳаракати – Ўзбекистон Либерал-демократик партиясидан кўрсатилган номзод Шавкат Миромонович Мирзиёев сайловчиларнинг 80.1 фоиз овозини тўплаб, ишончли ғалаба қозонганлигини эътироф этиб ўтди.
Қонунчилик муаммолари институти бўлим бошлиғи О.Акилов ўз маърузасида Олий Мажлис Сенати, Адлия вазирлиги, Давлат хизматлари агентлиги, БМТ Тараққиёт Дастурининг “Ўзбекистоннинг қишлоқ ҳудудларида давлат хизматларини тақдим этишни такомиллаштириш ва бошқарув даражасини ошириш” номли қўшма лойиҳаси доирасида ўтказилаётган “Халқ депутатлари маҳаллий Кенгашлари фаолиятининг функционал таҳлили”нинг дастлабки натижалари ҳақида маълумотлар бериб, халқ депутатлари туман Кенгаши доимий комиссияларининг туман ижтимоий-иқтисодий ҳаётида тутган ўрни ва функционал вазифалари ҳақида тўхталиб ўтди.
Кун тартибидаги масалалар юзасидан халқ депутатлари Жиззах вилояти Кенгаши депутати Г.Казакова, халқ депутатлари Бахмал тумани Кенгаши депутатлари О.Бойжигитов ва О.Абдувалиевлар сўзга чиқиб, маҳаллий Кенгашларда иш самарадорлигини ошириш мақсадида котибият штат бирликларини ошириш, ҳар бир ходимни доимий комиссияларга бириктириш юзасидан таклифларни билдиришди.
Муҳокама якунида халқ депутатлари Кенгашлари фаолиятини янада такомиллаштиришга қаратилган тавсиялар ишлаб чиқилди.
Йиғма ахборот-таҳлил бўлими