Уч авлод учрашуви – Қонунчилик муаммолари институти
Янгиликлар

   Порлоқ келажак – мозийни билиш, ўтмишдан тўғри сабоқ олиш асосида, адолат маёғи билан, улкан марраларни кўзлаб, шукроналикда, бирдамликда ва ҳамжиҳатликда қилинган эзгу саъй-ҳаракатлар натижасида барпо этилади.

   Янги Ўзбекистонни бунёд этишдек буюк мақсад йўлида тақдири ва тадбири муштарак суд-ҳуқуқ соҳалари намояндалари – тирик афсоналар ҳамда ҳозирги ва ёш авлод вакиллари иштирокида Ўзбекистон Республикаси давлат мустақиллигининг 30 йиллигига бағишлаб Тошкент шаҳрида ўтказилган “Уч авлод учрашуви” ва миллатлараро дўстлик фестивали ҳам шундай чуқур маъно-мазмун касб этди.

   Фестивалда Адлия ва Ички ишлар вазирликлари ҳамда Олий суд тизимида кўп йиллик ҳалол меҳнати, ибратли ҳаёти, ижтимоий фаоллиги билан бошқаларга ўрнак бўлган турли миллатларга мансуб фахрийлар, соҳанинг энг салоҳиятли ёш ходимлари ва мазкур тизимлардаги ўрта махсус, касб-ҳунар таълими тизими ўқувчилари дастлаб Темурийлар тарихи давлат музейига ташриф буюришди.

   Шундан сўнг, Тошкент давлат юридик университетида ташкил этилган мулоқотда ёш авлод вакиллари Адлия вазирлиги ва Олий суд тизимида узоқ йиллар ишлаган фахрийларнинг ўз меҳнат тажрибалари ҳақида сўзлаб берган хотираларидан бемисл ҳаётий сабоқлар олдилар.

   Тадбирда адлия ва суд органлари фахрийлари қаторида Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти директори, юридик фанлар доктори, профессор Фозилжон Отахонов ҳам иштирок этди ва ўз ҳаёт йўли ҳақида сўзлаб берди.

   Уч авлод вакилларининг мароқли суҳбатлари байрам дастурхонига уланиб кетди. Соҳа фахрийлари ва ходимларининг бевосита фаолиятлари моҳияти билан ҳамоҳанг мавзуда Ўзбек миллий академик драма театрида намойиш этилган “Ўзгалар дарди” спектакли ёшлар учун тарбиявий аҳамиятга эга бўлди.

   Мухтасар қилиб айтганда, фестивал фахрийларнинг инсон қадри улуғланган фаровон юртда юксак эътибор ва эъзоздан янада ғурур ва ифтихор туйишларига, ишлаб турган ходимлар ва соҳа давомчилари бўлмиш ёшлар эса ўз танлаган йўлларидан яна бир бор мамнуният ҳис қилиб, халқ розилиги йўлида бурчга садоқат, адолатли ва ҳалол меҳнат билан фақат олға боришлари учун мотивация олишларига замин яратди.

Leave a comment

Email manzilingiz chop etilmaydi. Majburiy bandlar * bilan belgilangan