Жорий йилнинг 11 ноябрь куни “Wyndham Tashkent” мехмонхонасида Инсон ҳуқуқлари бўйича Ўзбекистон Республикаси Миллий маркази ва БМТ Қочоқлар ишлари бўйича олий комиссари бошқармасининг Марказий Осиёдаги минтақавий ваколатхонаси ҳамкорлигида Қочоқлар ишлари бўйича олий комиссар ва Парламентлараро Иттифоқнинг парламент аъзолари учун Фуқаросизликнинг олдини олиш ва камайтириш, шунингдек қочқинларни ҳимоя қилиш бўйича парламентарийлар учун қўлланмаларнинг ўзбек тилидаги таржимаси тақдимоти ташкил этилди.
Тақдимотда Ўзбекистон Республикаси Олий Мажлиси Қонунчилик палатаси Спикерининг биринчи ўринбосари А.Саидов, БМТнинг Ўзбекистондаги доимий координатори вазифасини бажарувчи Ю.Ю., БМТнинг Марказий Осиёдаги ҚОКБ вакили Х.Шоддер, Парламентлараро Иттифоқнинг Халқаро гумманитар ҳуқуқ қўмитаси раиси А.Вадаи, Олий Мажлис Қонунчилик палатасининг Халқаро ишлар ва парламентлараро алоқалар қўмитаси раиси Д.Файзиева ва қўмита аъзолари, Олий Мажлис Қонунчилик палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси Ш.Бафаев, Олий Мажлис ҳузуридаги Қонунчилик муаммолари ва парламент тадқиқотлари институти директори Ф.Отахонов иштирок этди.
Тақдимотни Ўзбекистон Республикаси Олий Мажлиси Қонунчилик палатаси Спикерининг биринчи ўринбосари А.Саидов ва Қонунчилик палатасининг Халқаро ишлар ва парламентлараро алоқалар қўмитаси раиси Д.Файзиева олиб борди.
Тадбир аввалида Қонунчилик палатаси Спикерининг биринчи ўринбосари А.Саидов сўзга чиқиб, тақдимот қилинаётган қўлланмалар парламент аъзолари учун фойдали эканлиги, хусусан, у 2021 йил 6 ноябрь куни Ўзбекистон Республикасининг сайланган Президенти Шавкат Мирзиёевнинг Олий Мажлис палаталари қўшма мажлисидаги “Янги Ўзбекистон тараққиёт стратегияси асосида демократик ислоҳотлар йўлини қатъий давом эттирамиз” деб номланган маърузасидаги айрим вазифаларни парламент аъзолари томонидан ҳал этилишида муҳим манбаа бўлиб хизмат қилишини таъкидлаб ўтди.
БМТнинг Ўзбекистондаги доимий координатори вазифасини бажарувчи Ю.Ю. сўзга чиқиб, сўнгги йилларда Ўзбекистон Республикасида инсон ҳуқуқлари соҳасида амалга оширилган улкан ислоҳотларга ижобий баҳо бериб, келгусида ушбу қўлланмалар Ўзбекистон қонунчилигини такомиллаштиришда парламент аъзоларига асқотишини таъкидлади.
Марказий Осиёдаги БМТнинг ҚОҚБ вакили Х.Шоддер ҳозирги кунда дунёнинг турли бурчакларида юз бераётган ҳарбий можаролар ва оммавий тартибсизликлар инсонлар ҳаётига хавф солаётганлиги, хусусан, Афғонистонда Толибларнинг ҳукуматга келиши ёки Беларусь ва Польша Республикалари чегараларида йиғилган юзлаб қочоқларнинг масалалари дунё ҳамжамияти эътиборини тортаётганлиги, ушбу масалалар дунё мамлакатлари томонидан консенсус ва ўзаро тақсимлаш принципи асосида ҳал этилиши зарурлигини таъкидлади. Шунингдек, Ўзбекистон Республикасида парламент томонидан миллий қонунчиликни такомиллаштиришда ушбу қўлланманинг аҳамиятига тўхталиб ўтди.
Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти директори Ф.Отахонов сўзга чиқиб, юқорида келтириб ўтилган ўзбек тилига таржима қилинган ҳалқаро ҳуқуқий ҳужжатлар қўлланмалари, аввало, парламент аъзолари томонидан соҳага оид миллий қонунчиликни такомиллаштиришда зарурий қўлланма вазифасини бажариши, қолаверса, соҳа мутахассислари
ва илмий тадқиқотчилар ҳамда академик доира вакиллари учун илмий изланишларни амалга оширишда ишончли манбаа бўлишини қайд этиб ўтди.
Тадбир давомида Қонунчилик палатаси Қўмитаси раиси Д.Файзиева томонидан иштирокчиларга қўлланмаларнинг айрим жиҳатлари ҳақида зарур маълумотлар бериб ўтилди.
Тақдимот якунида ушбу йўналишдаги ишларни янада жадаллаштириш борасида фикр ва мулоҳазалар билдирилди.