Жорий йилнинг 6 декабрь куни Республика Маънавият ва маърифат марказида Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти ҳамда Республика Маънавият ва маърифат маркази ҳамкорлигида “Ўзбекистон Республикаси Конституцияси – янги Ўзбекистон тараққиётининг ҳуқуқий асоси” мавзусида маънавий-маърифий тадбир ташкил этилди.
Тадбирда Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти директори Ф.Отахонов, Республика Маънавият ва маърифат маркази раҳбарининг биринчи ўринбосари М.Қуронов, Тошкент давлат юридик университети профессори Ф.Муҳиддинова, Институт ходимлари А.Тешабоев, А.Кенжаев, Т.Баратов, олий таълим муассасаларининг профессор-ўқитувчилари ва талабалари, маърифат тарғиботчилари шунингдек оммавий ахборот воситалари вакиллари иштирок этди.
Тадбирни Республика Маънавият ва маърифат маркази раҳбарининг биринчи ўринбосари М.Қуронов олиб борди.
Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти директори Ф.Отахонов ўз кириш нутқида Ўзбекистон Республикаси Конституциясининг қабул қилиниш тарихи ва унинг мазмун-моҳияти ҳақида тушунтиришлар берди. Хусусан, Ф.Отахонов томонидан Конституциямизнинг тарихий, ҳуқуқий ва сиёсий-мафкуравий ҳужжат сифатида мамлакатимиз суверенитети ва халқимиз турмуш-фаровонлигини таъминлашдаги ўрни, дунё конституциявий амалиётининг ўзига хос жиҳатлари юзасидан асослантирилган маълумотлар берилди.
Тошкент давлат юридик университети профессори Ф.Муҳиддинова Ўзбекистон Республикаси Конституциясида инсон ҳуқуқ ва манфаатларининг кафолатланганлиги, сўнгги йилларда инсон ҳуқуқларини таъминлаш борасида кўрилаётган амалий чора-тадбирлар, хусусан, “темир дафтар”, “аёллар дафтари”, “ёшлар дафтари”нинг юритилаётганлиги, минглаб адашган юртдошларимизни юртимизга қайтариш мақсадида “меҳр операциялари” амалга оширилаётганлиги ҳақида маълумотларни берди.
Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти бўлим бошлиғи А.Тешабоев ёш авлоднинг ҳуқуқий онги, тафаккури ва маданиятини тарбиялашда Конституциянинг ўрни ҳақида тўхталиб, мактабгача таълим муассасалари ва умумий ўрта таълим мактабларида Бош қомусимиз ва амалдаги қонунлар тўғрисида содда тилда маълумотларни етказиш бўйича инновацион ўқитиш методларини жорий этиш, илғор хорижий давлатлар тажрибаси асосида ёш авлодни конституцияга ҳурмат руҳида тарбиялаш бўйича таклиф ва ташаббусларни билдирди.
Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти бош илмий ходими А.Кенжаев ўз маърузасида мустақил Ўзбекистоннинг конституциявий тараққиёт йўли, конституциявий тараққиёт ва жамият ривожининг ўзаро боғлиқлиги, конституциявий барқарорликни сақлаш бўйича жаҳон конституциявий тажрибаси ҳақида маълумотларни берди.
Тадбир якунида иштирокчилар ўзларини қизиқтирган саволлари юзасидан асослантирилган жавобларни олишди.
