Жорий йилнинг 7 декабрь куни Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти тузилмасида ташкил этилган Парламентаризмни ривожлантириш бўйича БМТ ўқув марказида Ўзбекистон Республикаси Олий Мажлиси Сенати ҳузуридаги Ёшлар парламенти аъзолари учун “Қонун ижодкорлиги” мавзусидаги махсус ўқув курслари бошланди.
Ўқувларни Олий Мажлис ҳузуридаги Қонунчилик муаммолари ва парламент тадқиқотлари институти директори, юридик фанлари доктори, профессор Ф.Отаханов кириш сўзи билан очиб бериб, тингловчиларга қонун ижодкорлиги жараёнининг мазмун-моҳияти юзасидан тушунтиришлар берди.
Ушбу ўқув курсининг биринчи кунида тингловчилар малакали мутахассислардан қонун ижодкорлиги жараёни бўйича керакли билимларни олишди. Хусусан, Олий Мажлис Қонунчилик палатаси Девони раҳбарининг ўринбосари Б.Раджабов, Қонунчилик муаммолари институти бўлим бошлиғи, юридик фанлар доктори, профессор А.Акилов, БМТ ўқув маркази раҳбари Ғ.Маҳаммаджанов томонидан қонун ижодкорлигининг ҳуқуқий асослари, қонунларни экспертиза қилиш тартиби, хорижий мамлакатларда қонун ижодкорлиги йўналишидаги илғор тажрибалар тўғрисида тингловчиларга маълумотлар бериб ўтилди.
Ўқув модули ўз ишини жорий йилнинг 9 декабрь куни давом эттиради.