Аввал хабар берганимиздек, жорий йилнинг 6 декабрь куни Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти тузилмасида ташкил этилган Парламентаризмни ривожлантириш бўйича БМТ ўқув марказида Ўзбекистон Республикаси Олий Мажлиси Сенати ҳузуридаги Ёшлар парламенти аъзолари учун “Қонун ижодкорлиги” мавзусидаги махсус ўқув курслари бошланган эди. Бугун, яъни 9 декабрь куни ўқув курсларининг иккинчи қисми давом эттирилди.
Ўқувларнинг иккинчи кунида ҳам тингловчиларга юқори малакали тренерлар томонидан қонун ижодкорлиги жараёнининг нозик жиҳатлари юзасидан керакли маълумотлар берилди.
Ўзбекистон Республикаси Олий Мажлиси Қонунчилик палатаси депутати М.Хусанова томонидан қонун лойиҳаларини Қонунчилик палатасига киритиш, қонун лойиҳалари депутатлар томонидан кўриб чиқилиши ва лойиҳани такомилига етказиш жараёни бўйича барча маълумотлар берилди.
Қонунчилик муаммолари институти шўъба мудири Ж.Худоберганов тингловчиларга халқаро қонун ижодкорлиги жараёнининг мазмун-моҳияти, халқаро ҳуқуқий ҳужжатларни ратификация қилиш тартиби, уларнинг ижросини назорат қилиш, шунингдек бугунги кунда халқаро ҳамкорлик алоқаларини ривожлантириш борасида Олий Мажлис палаталари томонидан амалга оширилаётган ишлар ҳақида тўхталиб ўтди.
Қонунчилик муаммолари институти бўлим бошлиғи А.Тешабоев томонидан Ўзбекистонда норматив-ҳуқуқий ҳужжатлар иерархияси, қонунларнинг барқарор ижтимоий муносабатларни тартибга солишдаги ўрни, қонунларни Олий Мажлис Сенати томонидан кўриб чиқишнинг ўзига хос жиҳатлари ва тартиби, қонунлар Президент томонидан имзоланиши ва эълон қилинишига доир зарур маълумотлар берилиб, Ёшлар парламенти аъзолари томонидан қонунларнинг мазмун-моҳиятини ҳудудлардаги тенгдошларига тушунтириш ишларини самарали олиб бориш юзасидан тавсиялар берилди.
Ўқув модули якунида тингловчилар ўзларини қизиқтирган саволларига асослантирилган жавобларни олишди.
