Куни кеча Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти директори, юридик фанлар доктори, профессор Фозилжон Отахонов томонидан Ички ишлар вазирлиги Академиясида ўқув машғулоти ташкил этилди.
“Янги Ўзбекистоннинг тараққиёт стратегиясини амалга оширишда ички ишлар органларининг устувор вазифалари: назарий ва амалий жиҳатлар” мавзусида ўтказилган тадбирда I даражадаги “Ташкилий-стратегик бошқарув” ҳамда II даражадаги “Ташкилий-тактик бошқарув” мутахассисликлари бўйича магистратура тингловчилари, шунингдек, Қонунчилик муаммолари институти бўлим бошлиғи Д.Рахманов иштирок этди.
Ф.Отахонов ўз маърузасида сўнгги йилларда мамлакатимизда давлат бошқаруви соҳасида қабул қилинган қонунлар, амалдаги қонун ҳужжатларига киритилган ўзгартиш ва қўшимчалар, уларнинг мазмун-моҳияти ва аҳамияти хусусида атрофлича маълумотлар бериб ўтди.
Шунингдек, 2022–2026 йилларга мўлжалланган Янги Ўзбекистоннинг тараққиёт стратегиясида ва уни “Инсон қадрини улуғлаш ва фаол маҳалла йили”да амалга оширишга оид давлат дастурида белгиланган давлат бошқаруви соҳасига доир долзарб масалалар, мазкур ҳужжатлардан келиб чиққан ҳолда келгусида ички ишлар органлари ва ходимлари олдида турган устувор вазифалар, уларни бажаришда амалга оширилиши муҳим аҳамиятга эга бўлган чора-тадбирлар хусусида батафсил тўхталиб ўтди.
Машғулот савол-жавоблар ва қизғин мунозараларга бой бўлди.
Бу каби тадбирлар мазкур олий юридик таълим муассасасининг тизим учун бугунги замон талабларига жавоб берадиган юксак салоҳиятли ва юқори малакали раҳбар кадрларни давлат ҳокимияти ва бошқаруви органларининг етук мутахассис-экспертлари билан ҳамкорликда тайёрлаш борасидаги амалий саъй-ҳаракатлари натижадорлигини оширишга хизмат қилади.