Қонун лойиҳаси муҳокамасига бағишланди – Қонунчилик муаммолари институти
Янгиликлар

     Куни кеча Ўзбекистон Республикаси Олий Мажлиси Қонунчилик палатасининг Саноат, қурилиш ва савдо масалалари қўмитаси, Молия вазирлиги ҳузуридаги Суғурта бозорини ривожлантириш агентлиги, Олий Мажлис ҳузуридаги Қонунчилик муаммолари ва парламент тадқиқотлари институти ҳамда Ўзбекистонда фаолият кўрсатаётган суғурта компаниялари ҳамкорлигида семинар ўтказилди.

     Қонунчилик палатаси депутатлари, соҳа мутахассислари ва экспертлар иштирок этган тадбирда “Ташувчининг фуқаролик жавобгарлигини мажбурий суғурта қилиш тўғрисида”ги Ўзбекистон Республикаси Қонунига ўзгартишлар киритиш ҳақида”ги қонун лойиҳаси муҳокама қилинди.

     Қонунчилик муаммолари ва парламент тадқиқотлари институти бош илмий ходими Саидахмад Ишанходжаев ўзгартиш киритилаётган нормалар ижросини таъминлаш механизмлари ва мажбурий суғуртани амалга оширмаган ташувчининг фуқаролик жавобгарлиги масалаларига тўхталиб ўтди.

     Шунингдек, Маъмурий жавобгарлик тўғрисидаги кодекснинг 1461-моддасида ташувчининг йўловчилар ҳаёти, соғлиғи ва (ёки) мол-мулкига зарар етказганлик учун қонунда белгиланган ўз фуқаролик жавобгарлигини мажбурий суғурта қилиши бўйича мажбуриятини бажармаслиги мансабдор шахсларга базавий ҳисоблаш миқдорининг етти бараваридан ўн бараваригача миқдорда жарима солишга сабаб бўлиши белгиланганини ва ушбу нормани якка тартибдаги тадбиркорларга нисбатан татбиқ этиш масаласини жиддий кўриб чиқиш зарур эканлигини таъкидлади.

     Семинар қизғин мунозараларга бой бўлди.

Leave a comment

Email manzilingiz chop etilmaydi. Majburiy bandlar * bilan belgilangan