Корпоратив волонтёрликнинг ҳуқуқий асослари белгиланмоқда – Қонунчилик муаммолари институти
Янгиликлар

     Куни кеча «Волонтёрлик фаолияти тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақидаги қонун лойиҳасининг муҳокамаси бўлиб ўтди.

     Олий Мажлис Қонунчилик палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси томонидан ўтказилган ушбу тадбирда қуйи палата депутатлари, Олий Мажлис ҳузуридаги Қонунчилик муаммолари ва парламент тадқиқотлари институти, Вазирлар Маҳкамаси, Ёшлар ишлари агентлиги вакиллари, Қонунчилик палатаси ҳузуридаги Ёшлар парламенти аъзолари ҳамда экспертлар ва олимлар иштирок этди.

     Таъкидланганидек, мазкур ҳужжат билан амалдаги Қонунга корпоратив волонтёрлик фаолиятини тартибга солувчи қўшимчалар киритиш назарда тутилмоқда ҳамда «корпоратив волонтёр – бу ташкилий-ҳуқуқий ва мулкчилик шаклидан қатъи назар, корхона, муассаса, ташкилотнинг корпоратив волонтёрликка ихтиёрийлик асосида жалб этилаётган ходими» сифатида белгиланиб, «корпоратив волонтёрликка жалб қиладиган иш берувчи» тушунасига таъриф берилмоқда.

   Мунозараларда сўз олган Қонунчилик муаммолари ва парламент тадқиқотлари институти етакчи илмий ходими Жавоҳир Сафаев ушбу қонун лойиҳаси бўйича Институт томонидан илмий хулоса берилганлигига урғу бериб, лойиҳадаги ихтиёрийлик асосида иш берувчи ташаббусига кўра ходимларни волонтёрликка жалб қилиш масаласи унинг амалиётда ижро этилишида юзага келадиган субъектив омилларга кўра қонундаги ихтиёрийлик тамойилига зид келиб қолиши мумкинлигига алоҳида тўхталиб ўтди ва шу каби тушунчаларни уларнинг ифодаланиши билан ижроси ўртасидаги аниқлик ва бир хилликни таъминлаш мақсадида такомилига етказиш муҳим эканлигини таъкидлади.

   Мутахассислар фикрига кўра, қонун лойиҳасининг қабул қилиниши корпоратив волонтёрликни амалга оширишнинг ҳуқуқий асослари белгиланишига ва бу орқали волонтёрликнинг ушбу шакли ривожланишига хизмат қилади.

Leave a comment

Email manzilingiz chop etilmaydi. Majburiy bandlar * bilan belgilangan