Жорий йилнинг 29 март куни Ўзбекистон Республикаси Олий Мажлиси Сенати Раиси Танзила Нарбаева бошчилигидаги парламент делегацияси Олмаота шаҳрида бўлиб ўтаётган ва МДҲга аъзо давлатлар Парламентлараро Ассамблеясининг (ПА) 30 йиллигига бағишланган Ассамблея Кенгашининг юбилей мажлисида иштирок этмоқда.
Йиғилишда МДҲ Парламентлараро Ассамблеяси Кенгаши раиси, Россия Федерацияси Федерал Мажлиси Федерация Кенгаши раиси Валентина Матвиенко, Қозоғистон Республикаси Парламенти Сенати раиси Маулен Ашимбаев, Озарбайжон Республикаси Миллий Ассамблеяси спикери Сагиба Али қизи Гафарова, Арманистон Миллий Ассамблеяси раиси Ален Симонян, Тожикистон Республикаси Мажлиси милли Мажлиси Оли раиси Рустам Эмомали, шунингдек, МДҲ ПАга аъзо давлатлар парламент делегациялари, халқаро ташкилотлар раҳбарлари ҳам иштирок этмоқда.
Тадбир аввалида делегациялар раҳбарлари Мустақил Давлатлар Ҳамдўстлиги давлатлари раҳбарларининг табрикларини ўқиб эшиттирди. Хусусан, Сенат Раиси мажлис иштирокчиларининг эътиборини Ўзбекистон Республикаси Президенти Ш.М. Мирзиёевнинг табригига қаратди.
Унда ўтган давр мобайнида Парламентлараро Ассамблея Ҳамдўстлик мамлакатлари ўртасидаги кўп қиррали ҳамкорликнинг энг долзарб масалаларини муҳокама қилиш учун муҳим майдонга айлангани алоҳида қайд этилган.
Ўзбекистон Республикаси Олий Мажлиси Ассамблея фаолиятида, парламентлараро ҳамкорликни мустаҳкамлашда фаол иштирок этаётгани алоҳида таъкидланди. Ўзбекистон МДҲ Парламентлараро Ассамблеяси доирасида Ҳамдўстлик мамлакатлари ўртасида тинчлик, барқарорлик, дўстлик, ишонч ва яхши қўшничилик муносабатларини мустаҳкамлаш борасидаги фаол ишларини давом эттириш ниятида эканлиги қайд этилди.
Парламентлараро Ассамблея Кенгашининг юбилей мажлиси давом этмоқда.