Жорий йилнинг 20 июль куни Олий Мажлис Сенати ва Ўзбекистон Иқтисодиёт ассамблеяси ўртасида ҳамкорлик меморандуми имзоланди.
Меморандумни Ўзбекистон Республикаси Олий Мажлиси Сенати Раиси Танзила Нарбаева ҳамда Ўзбекистон Иқтисодиёт ассамблеяси раиси Мухтор Умаров имзоладилар.
Ушбу ҳужжатда замонавий қонунчилик базасини шакллантириш, амалга оширилаётган иқтисодий ислоҳотларни қўллаб-қувватлаш, ишбилармонлик муҳитини яхшилаш, тадбиркорликни қўллаб-қувватлаш орқали ҳудудларнинг жадал ривожланишини таъминлаш, бюрократик тартиб-тамойилларни қисқартириш, экспортни рағбатлантириш назарда тутилган.
Сенат Раиси Т.Нарбаева таъкидлаганидек, меморандум тадбиркорлар муаммоларини ҳал этишда Сенатнинг фуқаролик жамияти институтлари ва тадбиркорлик субъектлари билан ҳамкорлигини мустаҳкамлашга хизмат қилади.
Маълумот ўрнида, Ўзбекистон Иқтисодиёт ассамблеяси 2021 йилда ташкил этилган. Ассамблея 13 та уюшма манфаатларини ҳимоя қилади ва ўз сафларида 100 мингга яқин тадбиркорларни бирлаштиради.