Жорий йилнинг 16 декабрь куни Ўзбекистон Республикаси Бош прокуратураси томонидан ЕХҲТнинг Ўзбекистондаги лойиҳалари Координатори офиси, БМТ Гиёҳвандлик ва жиноятчилик бўйича бошқармасининг Марказий Осиёдаги Минтақавий ваколатхонаси, “Минтақавий мулоқот” ХННТ билан биргаликда Тошкент шаҳрида жойлашган “Нуаtt Rеgеnсу” меҳмонхонасида “Ўзбекистон прокуратураси: кеча, бугун ва эртага” мавзусида халқаро илмий-амалий конференция ташкил этилди.
Тадбирда Ўзбекистон Республикаси Олий Мажлиси Қонунчилик палатаси депутатлари ва Сенати аъзолари, Бош прокуратура ходимлари,
Олий Мажлис ҳузуридаги Қонунчилик муаммолари ва парламент тадқиқотлари институти директори ҳамда Институт ходимлари, Олий суд, Конституциявий суд вакиллари, қатор вазирлик ва давлат идоралари раҳбарлари ҳамда масъул ходимлари, халқаро ташкилотлар ва хорижий элчихоналарнинг вакиллари, хорижий мамлакатлар Бош прокуратураларининг раҳбар ходимлари, кенг жамоатчилик ва оммавий ахборот воситалари вакиллари иштирок этди.
Тадбирни Ўзбекистон Республикаси Бош прокурори Н.Йўлдошев, Олий Мажлис Сенати Раисининг биринчи ўринбосари С.Сафоев ва Қонунчилик палатаси Спикерининг биринчи ўринбосари А.Саидов, Халқаро прокурорлар ассоциацияси президенти Чхоль-Кю Хван ва МДҲ давлатлари Бош прокурорлари мувофиқлаштирувчи кенгаши ижрочи котиби В.Зимин кириш ва табрик сўзлари билан очиб беришди.
Қонунчилик муаммолари ва парламент тадқиқотлари институти директори, юридик фанлари доктори, профессор Ф.Отахонов ўзининг “Прокуратуранинг конституциявий мақоми ва қонунийликни таъминлашдаги роли ” мавзусидаги маърузасида прокуратура органларининг конституциявий орган сифатидаги мақоми, уларнинг конституция ва қонун устунлигини таъминлашдаги ўрни, прокуратура тизими ва фаолиятини янада такомиллаштириш масалалари юзасидан асослантирилган маълумотларни берди.
Байрамона руҳда ва юқори савияда ўтган конференция ишида тегишли қонунчилик ва соҳа фаолиятини такомиллаштириш ҳамда халқаро ҳамкорликнинг истиқболлари хусусида фикрлар алмашилди.
Тадбир якуни бўйича анжуман материаллари тўплами нашр этилиши белгиланди.