ЁШ ҚОНУНШУНОСЛАР КЛУБИ
Шу муносабат билан, Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институтининг 2018 йил 6 майдаги қарори асосида “Ёш қонуншунослар клуби” тузилиб, Институтнинг ёш ходимлари билан бир қаторда, 20 ёшдан 30 ёшгача бўлган сиёсий партияларнинг “Ёшлар қаноти” аъзолари, давлат органлари ва олий таълим муассасалари талабаларидан иборат таркибда ташкил этилди.
Клубнинг асосий вазифалари этиб қуйидагилар белгиланди:
- Ўзбекистон Республикасида қонун ижодкорлиги ва қонунчиликни қўллаш амалиётининг долзарб муаммоларини муҳокама қилиш;
- қонунчилик техникаси, норматив-ҳуқуқий ҳужжатларни юридик-техник расмийлаштириш қоидалари, норма ва ҳуқуқ ижодкорлиги масалалари бўйича илмий-амалий муҳокамалар (диспут) ўтказиш;
- Клуб аъзолари томонидан Институт ходимларига жамоатчилик асосида қонун лойиҳалари, таҳлилий-ахборот материалларини тайёрлашда кўмаклашиш, ёш олим ва мутахассисларнинг қонунчилик ташаббусларини муҳокама қилиш;
- қонун ижодкорлиги фаолиятининг сифатини янада ошириш бўйича устувор йўналишларни белгилашда ёшларнинг фаоллигини ошириш ва салоҳиятларидан фойдаланиш.
Клубга 20 ёшдан 30 ёшгача бўлган номзодлар ёзма ва онлайн тарзда аъзо бўлиши мумкин. Клубга аъзолик тўловлар ва бадалларсиз ихтиёрийлик ва жамоатчилик асосида амалга оширилади.
2018 йил 11 июнь куни Қонунчилик муаммолари ва парламент тадқиқотлари институти қошида ташкил этилган “Ёш қонуншунослар клуби” Мувофиқлаштирувчи ҳайъатининг Клуб аъзолари билан биринчи мажлиси ўтказилди. Мажлисда Ўзбекистон Республикаси Олий Мажлис ҳузуридаги Қонунчилик муаммолари институти Директори ташкил қилинган Клубнинг мақсад ва вазифалари, келажакдаги режаларига тўхталиб ўтиб, Клуб аъзоларини қизиқтирган саволларга жавоб берди. Мажлис давомида Клуб аъзолари йўналиши бўйича секцияларга тақсимланиб, тегишли бўлимларга бириктирилди.
Ҳозирда Клуб аъзолари сони 357 кишини ташкил этади ва уларнинг аксарияти, олий таълим муассасаларида таҳсил олаятган талаба ва магистрлардир. Бугунги кунга Клуб томонидан Тошкент давлят юридик университети, Жахон иқтисодиёти ва дипломатия университети, Тошкентдаги халқаро Вестминстр университети, Тошкент давлат иқтисодиёт университети, Тошкент тиббиёт академияси, Тошкент педиатрия тиббиёт институти ва Тошкент давлат шарқшунослик институти талабалари билан кенг ҳамкорлик йўлга қўйилган.
Ўтган давр мобайнида Клуб аъзолари томонидан бир қанча норматив-ҳуқуқий ҳужжатлар муҳокама қилинди. Жумладан, Норма ижодкорлиги фаолиятини такомиллаштириш Концепцияси, Ўзбекистон Республикасининг солиқ сиёсатини такомиллаштириш Концепцияси, 2019-2025 йилларда Ўзбекистон Республикасининг соғлиқни сақлаш тизимини ривожлантириш Концепцияси, Ўзбекистон Республикасининг “Қурол тўғрисида”ги, “Уруғчилик тўғрисида”ги, “Фуқароларнинг репродуктив саломатлигини сақлаш тўғрисида”ги қонун лойиҳалари юзасидан баҳс-мунозаралар ўтказилиб, қатор таклифлар берилди.
Клуб ўз фаолиятини янада кенгайтиришга, хусусан, юртимиздаги бошқа олий таълим муассасалари билан ҳам алоқаларни ўрнатишга ва ўз аъзолари сонини янада оширишга эътибор қаратиб, чуқур билимли ва фаол ёшларда қонунчилик фаолияти билан яқиндан танишиш ва тажриба тўплашга кенг имконият яратади.